जत्रेत काफिरांच्या गोतावळा कुणाचा ?
ही पालखी कुणाची हा सोहळा कुणाचा?

साधून डाव गेले ते पाहुणे कुणाचे?
गर्दीत आवळ्यांच्या तो कोहळा कुणचा?

कैफात आरत्यांच्या हा जोगवा कुणाचा?
तांड्यात मोगलांच्या तो मावळा कुणाचा?

दंग्यात सोयरेही का गाढ झोपलेले?
रक्तात माखलेला तो कोथळा कुणाचा?

हा दोष आंधळ्यांचा की डाव डोळसांचा?
पिंडीवरी शिटे जो तो कावळा कुणाचा?

बाजार मांडणारे का चूप राहिले रे?
लाचार पंढरीला तो सावळा कुणाचा?
[साप्ता.सकाळ,ऐसी अक्षरे,आदि अनेक अंकातून ]
--------संजय बोरुडे,अहमदनगर.
संपर्क :- 9372560518
9860056192