मराठी गझल : एक अखंड मैफल!

कार्यशाळेत नवीन : ‘शेरखान’ स्पर्धा (अर्थात, परीक्षा परीक्षकांची!!) मित्रहो, कार्यशाळेसाठी आलेल्या प्रवेशिका आपण रोज वाचतो आहोत, त्यांवर साधक बाधक चर्चा करतो आहोत. आणि त्याचबरोबर पडद्यामागे नियामक मंडळाचे सदस्य त्यांचं मूल्यमापनही करत आहेत. या मूल्यमापनातूनच आपले तीन विजेते शेवटी निवडले जातील. पण नियामक मंडळातील काही सदस्यांनीही त्यांच्या ‘तरही’ प्रवेशिका आपल्याकडे सुपूर्त केल्या आहेत त्यांचं काय? त्यांचं मूल्यमापन कोण करणार? तर ही अतिशय महत्वाची जबाबदारी आम्ही तुमच्यावरच सोपवत आहोत. आजपासून रोजच्या प्रवेशिकांबरोबर इथे काही सुटे शेर प्रसिद्ध होतील. कुठला शेर कुठल्या गज़लकाराचा आहे ते सांगितलं जाणार नाही. तुम्ही इतकंच करायचं, तुमच्या प्रतिसादात त्यातील प्रत्येक शेराला १० पैकी गुण द्यायचे. ‘गज़लमधील प्रत्येक शेर ही स्वतंत्र कविता असली पाहिजे’ हा तर सर्वमान्य संकेत आहे. आपण खरंच तसं लिहीतो का, आणि वाचतानाही प्रत्येक शेराचं खरंच स्वतंत्रपणे रसग्रहण करतो का, या दोन्हीची परीक्षाच ही. सगळे शेर प्रकाशित करून झाले, की तुम्ही दिलेल्या गुणांवरून आपण निवडणार आहोत नियामक मंडळापैकी सर्वोत्तम गज़ल. आणि त्यासाठी बक्षिसही देणार आहोत. पण ते त्या गज़लकाराला नव्हे, तर त्या गज़लमधील शेरांना ज्या सदस्याने सर्वात जास्त गुण दिले असतील त्याला - आपल्या ‘शेरखानला !! पण त्यासाठी त्या सदस्याने ‘सगळ्या शेरांवर गूण दिलेले असायला हवेत. मग, करायची सुरुवात?

तंत्रशुद्ध आणि दर्जेदार गझल लिहु इच्छिणार्‍या गझल प्रेमी व गझलकारांसाठी आम्ही ही ऑनलाईन गझल कार्यशाळा सुरू करत आहोत.
मराठी गझल.कॉम परिवारात गझल लिहिण्याची इच्छा आहे पण त्याचे तंत्र पुरेसे व नीट माहित नाही असे अनेक जण आहेत. तसंच गझलेचं तंत्र माहित आहे पण मंत्र अजून सापडलेला नाही असेही काही आहेत. आणि अर्थातच येथील अनेक सदस्य हे तंत्रशुद्ध आणि दर्जेदार गझल लिहिणारे देखील आहेत. तर जे तंत्रशुद्ध आणि दर्जेदार गझल लिहु शकतात अशांनी नवोदित गझलकारांसाठी चालवलेला हा उपक्रम आहे.
पहिल्या कार्यशाळेचा तपशील पुढे देत आहोत

या ठिकाणी सर्वांनी आपले प्रश्न/शंका "प्रतिसाद" वर टिचकी देऊन लिहाव्यात व गझल "add child page " वर टिचकी देऊन उपलब्ध होणार्‍या जागेत लिहाव्यात . तुम्ही "add child page " ह्या जागेत लिहीलेली गझल पूर्ण चर्चेअंतीच प्रकाशित होतील .
या गझल व संबंधित चर्चा मुख्य पानावरच्या गझल / प्रश्न / लेख मधे लिहू नयेत ही विनंती.

तर मित्रहो

आपल्या मराठीगझल.कॉम च्या पहिल्या कार्यशाळेसाठी गझलकार सारंग पतकी यांनी निवडलेलं मीटर असं आहे .

गा ल गा गा , गा ल गा गा , गा ल गा गा

सारंग यांच्याच ह्या मीटरमधल्या एका गझलची पहिली ओळ , मतल्याचा उला मिसरा, देत आहोत

हुंदका साधा तुझा सांगून गेला .

"गेला" हा रदीफ सांभाळून काफिया ला सूट ठेवण्यात आलेली आहे. लावून गेला , भेटून गेला वगैरे. फक्त दीर्घ ऊ ची अलामत सांभाळून पुढे न गेला येणं गरजेचं आहे.

कार्यशाळेचे हे नियम लक्षात असू द्या :
१. गझल पाठवण्याची अंतिम तारीख सोमवार, दिनांक ९ एप्रिल २००७ ही आहे.
२. आलेल्या प्रवेशिकेत काही तांत्रिक सुधारणा हवी असल्यास नियामक मंडळाचे सदस्य मेलवरून आपल्याशी संपर्क साधतील.
३. मंगळवार, दि. १० एप्रिलपासून गझल प्रकाशित करायला सुरुवात होईल.
४. ज्या क्रमाने गझल निर्दोष होत जातील त्या क्रमानेच प्रसिद्ध होतील.
५. आलेल्या सर्व प्रवेशिका निर्दोष होवून प्रसिद्ध झाल्यावर त्यातून सर्वोत्तम तीन प्रवेशिका निवडल्या जातील.
६. या तीन प्रवेशिकांना नियामक मंडळातर्फे गझलसंबंधी भेट देण्यात येईल.
७. सर्वोत्कृष्ट ठरलेल्या गझलकाराची नियामक मंडळातर्फे मुलाखत घेतली जाईल. ही मुलाखत फोटोसहित आपल्या संकेतस्थळाच्या मुखपृष्ठावर झळकेल.

सर्व गझलकारांना हार्दिक शुभेच्छा

आणि आता सादर करत आहोत कार्यशाळेतील प्रथम गझल....