मराठी गझल - भास आहे सर्वकाही... - प्रतिसाद

आवडेश!

चिन्नु — Thu, 05 Apr 2007 11:47:24 -0500

मीनुशी सहमत. गजल सहज आणि प्रवाही वाटली.

चिन्नु

प्रवाही सत्य

विसुनाना — Tue, 03 Apr 2007 03:53:47 -0500

माझ्या मताप्रमाणे सत्य हे प्रखर, तेजस्वी, लाव्हयाप्रमाणे (किंवा लोखन्डाच्या रसाप्रमाणे) उकळते आहे. म्हणून ते वहातं - प्रवाही आहे.
पण आपल्या जाणीवा मात्र आपापल्या द्रु (इथे 'दृ' कसे लिहायचे असते?!!)ष्टिकोनाप्रमाणे बद्ध - पर्यायाने गोठलेल्या आहेत.
हे झालं माझं मत.
'प्रसाद' ची गझल फारच सुंदर आहे. आणखी हव्यात .. अशाच!

प्रभावी आणि प्रासादिक

मानस६ — Sat, 31 Mar 2007 12:25:18 -0500

प्रभावी आणि प्रासादिक..तुझ्या नावाप्रमाणेच ...लिखते रहो...
मानस ६

मस्त

वैभव — Fri, 30 Mar 2007 07:27:03 -0500

फार सुंदर जमलीये प्रसाद. सहीच !!!

वाह प्रसाद , क्या बात है..

मीनु — Fri, 30 Mar 2007 00:32:43 -0500

सुंदर ..
सगळेच शेर पुन्हा लिहायला लागतील आवडलेले लिहायचे तर...

वा..

केशवसुमार — Thu, 29 Mar 2007 03:00:19 -0500

प्रसादशेठ,
एकदम झकास गझल..
साधी-सोपी..खुप आवडली
आमचा एक खोडकर प्रतिसाद इथे वाचा

केशवसुमार

असं पहा...

प्रसाद — Thu, 29 Mar 2007 01:07:07 -0500

आपल्या आयुष्यातल्या व्यक्ती, त्यांच्या सोबतची आपली नाती आणि आपल्या भोवतालची परिस्थिती... या तीनही गोष्टींमधे सतत बदल होत असतो... हे आपल्या भोवतीचं बदलणारं / प्रवाही सत्य... या बदलांबाबत आपल्या जाणिवा जागृत असायला हव्यात किंवा आपली संवेदनशीलता प्रखर असायला हवी... पण ते तसं होताना दिसत नाही असं काहिसं या शेरामधे म्हणायचं आहे!

सर्वत्र.... फार आवडला !

माणिक जोशी — Wed, 28 Mar 2007 13:21:41 -0500

शान्तता पण अर्थवाही... सहिच !
पाठ फिरता... जमूनच गेला रे अगदि !
प्रवाही... हा पण अगदि आर पार केलायेस !

खूप खूप आवडली रे !

खूप छान !

जयश्री अंबासकर — Tue, 27 Mar 2007 22:55:09 -0500

प्रसाद, ही गझल सुद्धा खूप आवडली.
तो म्हणे सर्वत्र आहे
(भेट नाही एकदाही...)........ वा!

शब्द सारे फोल होते
शांतता पण अर्थवाही... अगदी नेमकं!

पाठ फिरता पावसाची
मेघ उरले खिन्न काही.........सगळ्यात आवडलेला शेर. कल्पनाच फार गोड आहे.

'Fluid' सत्य

स्वाती — Tue, 27 Mar 2007 10:22:28 -0500

प्रसाद,
मेल केली आहेच, पण इथे चर्चा सुरू आहे म्हणून इथेही लिहीते.

तुझ्या 'fluid' सत्यावर अजून विचार करत्ये. :)
ज्या fluid सत्याचा निर्देश केला आहेस, ते जर 'संवेद्य' असेल, तर जाणीवा गोठलेल्या कश्या असतील?
सत्य बदलतं, perceptions बदलत नाहीत.. असं म्हणायचंय का?
म्हणजे उदा. माणूस बदलला तरी आपली त्याच्याबद्दलची मतं बदलत नाहीत.. असं?
यात गडबड मला अशी वाटते की सत्य आणि perception या मुळातच दोन पूर्णतः वेगळ्या (exclusive) गोष्टी नाहीत का?
सत्य हे शाश्वत, पण multidimentional असतं आणि perception ही एक सहसा तोकडी आणि rigid अशी frame of reference असते, हे पटण्यासारखं आहे. पण 'प्रवाही' मला झेपलेलं नाही अजून. :)

बहुमत्- प्रवाह्

रसिक — Tue, 27 Mar 2007 07:49:28 -0500

सत्य प्रवाही / बदलणार कस होईल याचा विचार केला तर प्रवाह आणि सत्य वळवणारी कारणे याचा संबंध लक्षात येतो. बहुमताने ठरणार सत्य हे आपल्याला अपेक्षित नसल तरी पूर्णपणे चुकीचे नाही. एकाच शेरातून अनेक अर्थपदर उलगडू शकतात ह्यात शेराच यश दडल आहे असे वाटत नाही का?

खुलास्याबद्दल आभार.

शांतता पण अर्थवाही

प्रणव सदाशिव काळे — Tue, 27 Mar 2007 04:53:58 -0500

शब्द सारे फोल होते
शांतता पण अर्थवाही...

शेवटी येतो स्वतःशी
मी दिशा हिंडून दाही

खूप आवडले.

सत्य

प्रसाद — Tue, 27 Mar 2007 02:26:48 -0500

सतीश

आपल्या प्रतिक्रियेबद्दल धन्यवाद...

सर्वसाधारणपणे असं म्हटलं जातं की सत्य हे अपरिवर्तनीय / शाश्वत आहे आणि त्याबद्दलच्या आपल्या संवेदना / जाणिवा / कल्पना मात्र बदलत जातात... मात्र मी या शेरात contradictory view मांडायचा प्रयत्न केला आहे (जे मत पूर्णपणे चुकीचंही असू शकेल!). माझं या शेरामधे असं म्हणणं आहे की सत्य हे प्रवाही / बदलणारं / dynamic आहे.... मग ते जाणून घेण्यासाठी काम करणार्या आपल्या जाणिवा मात्र गोठलेल्या / static / frozen का?

येथे बहुमतानं ठरणारं ते सत्य असं मला कुठेच म्हणायचं नाही.... हा विचार संवेद्य सत्याच्या (perceived truth) बाबतीतच आहे.

सुंदर

चित्तरंजन भट — Tue, 27 Mar 2007 01:43:49 -0500

सुंदर गझल. नेहमीच्याच कल्पना अगदी प्रभावीपणे, प्रवाहीपणे आणि प्रासादिकपणे मांडल्या आहेत. सारेच शेर आवडले. अर्थवाही शांतात, स्वतःशी दाही दिशा हिंडणे, खिन्न काही मेघ विशेष सुंदर.
मक्त्यात 'सत्य हे फ्लुइड असते', असे जे प्रसादला म्हणायचे आहे ते पटते. मक्त्यावरून शेर आठवला. त्या शेराचे ह्या शेराशी कुठलेही साम्य नाही. फक्त आठवला म्हणून देतो आहे. तो असा-

वक़्त की दहलीज़ पर जलता दिया कोई नहीं
सारे दर्या मुंजमिद, बहता हुआ कोई नहीं

मुंजमिद म्हणजे गोठलेले. दर्या म्हणजे नदी हे माहीत असेलच.

प्रसाद गझल फार-फार आवडली.

चित्तरंजन

सत्याबद्दल

essem — Tue, 27 Mar 2007 01:26:19 -0500

-मला वाटतं स्वत: शायरानं आपली कल्पना स्पष्ट करायला हवी. कारण सत्य हे वस्तुत: अपरिवर्तनीय, शाश्वत असायला हवं. "बहुमतानं ठरतं ते सत्य? बदलत जातं ते सत्य?" हेच का कवीला अभिप्रेत आहे? जर असेल (किंवा जरी नसेल तरी) जाणिवांच्या संदर्भातलं सत्य ही कल्पना स्पष्ट करायला हवी कवीनं.

-सतीश

भास आहे सर्वकाही...

प्रसाद — Mon, 26 Mar 2007 12:30:28 -0500

भास आहे सर्वकाही...
जीवनाला अर्थ नाही

तो म्हणे सर्वत्र आहे
(भेट नाही एकदाही...)