मराठी गझल - १६ : सुधीर जोशी - प्रतिसाद

धन्यवाद

jo_s — Fri, 27 Apr 2007 05:15:56 -0400

माणिक, प्रणव, वैभव, विसुनाना, कुमार, नचिकेत
अभिप्रायासाठी धन्यवाद.

माणिक: अतनू म्हणजे शरीर नसलेला. इथे मला शरीर नसलेले व त्यामुळे भौतीक, सामाजीक बंधनातून मुक्त असे चैतन्य अपेक्षीत आहे;
तसच अजून एक अर्थ असाही येतो की शरीर नसल्याने अतनू अवस्थेत मी (तुझ्याबरोबर) सर्वत्र आहेच;
आणखी एक म्हणजे अतनू म्हणजे शरीर नसलेली शक्ती म्हणजेच देव ही होऊ शकेल म्हणजेच शरीराचा भार त्यागून आता मी देवाशी एकरूप आहे.

कुमार :
आज चुकले बोल माझे का सख्यारे
जीव हा माफी तुझी मागून गेला
यात
माझे बोलणे चुकले असेल तर त्यासाठी तुझी माफी मागून जात आहे
किंवा माझे काही चुकले असेल तर तू बोल, त्यासाठी तुझी माफी मागून जात आहे

असा अर्थ अपेक्षीत आहे.

सुधीर

छान...

नचिकेत — Thu, 26 Apr 2007 23:46:38 -0400

छान आहे गझल, सुधीर.

'लौकिकाचे पाश' आणि 'दु:ख जाण्याचे' विशेष आवडले.

पु.ले.शु.
- नचिकेत आठवले

वा!

कुमार — Thu, 26 Apr 2007 08:07:06 -0400

वा सुधीर,
मक्ता आणि भास ग्रीष्माचे हे शेर आवडले.
मतला आणि इतर अनेक शेर थोडे अजून नीट जुळवायला हवे होते असं मात्र वाटलं. (उदा. मेघांचा शेर.. त्यातली कल्पना मला समजली नाही.)
तसंच 'जीव माफी मागून गेला' हे खटकलं, पहिल्या ओळीशीही जुळवा-जुळव सहज वाटली नाही. त्यापेक्षा तो शेर तृतीयपुरुषी करून -
एवढे अपराध कसले त्याचे सख्या रे
जन्मभर तो का क्षमा मागून गेला
असा (किंवा यापेक्षा खूप चांगला) बदल सुचवावासा वाटला.

-कुमार

ठीक आहे.

विसुनाना — Thu, 26 Apr 2007 06:12:34 -0400

दुःख जाण्याचे असे येथे क्षणाचे
गाव माझा आज मज विसरून गेला -झकास!

भास ग्रीष्माचे, कसे होती वसंती
बहर बागेचा कसा उधळून गेला - चांगला आहे.
सानी मिसरा असा केला तर?-
मोहराचा जन्म तो जाळून गेला. (इथे 'जन्म' ऐवजी दुसरा समर्पक शब्द वापरता येईल.)

अतनुबद्दल शंका आहे.
हीच गझल याहून चांगली लिहू शकाल असा विश्वास आहे.थोडे काम केले पाहिजे.
माझे-५/१०.

वा सुधीर

वैभव — Thu, 26 Apr 2007 05:02:32 -0400

दुःख जाण्याचे असे येथे क्षणाचे
गाव माझा आज मज विसरून गेला

गझल छानच पण हा शेर सर्वात जास्त आवडला

लौकिकाचे पाशही तोडून गेला

प्रणव सदाशिव काळे — Wed, 25 Apr 2007 22:44:21 -0400

एकही शेर ठराविक गुणवत्तेच्या खाली जात नाही हे ह्या गझलेचे वैशिष्ट्य वाटले. गुणवत्तेचे इतके सातत्य एखाद्याच गझलेत बघायला मिळते.

काळसीमांचा न आता बंध देही
लौकिकाचे पाशही तोडून गेला

आवडले.

वाह... सुधीर ...वाह !

माणिक जोशी — Wed, 25 Apr 2007 21:49:19 -0400

लौकीकाचे पाश... मस्तच रे !
भार जो तो... हा शेर पुसट वाटतोय मला... अतनू हा शब्द परिचयाचा नाही..!
बहर बागेचा... आह !
मक्ता.. अप्रतिम रे मित्रा !

१६ : सुधीर जोशी

jo_s — Thu, 26 Apr 2007 00:00:00 -0400

हुंदका साधा तुझा सांगून गेला
प्राण माझा देह हा सोडून गेला

दाट होते मेघ गगनी भारलेले
नीर भरला मेघ का वाजून गेला